केज /प्रतिनिधी
प्रशासनाला हादरवून सोडणारी धक्कादायक घटना समोर आली आहे. तहसीलदारांच्या बनावट सह्या करून अर्धन्यायिक प्रकरणाचा आदेश पारित केल्याप्रकरणी तत्कालीन नायब तहसीलदार विरुद्ध फसवणुकीचा गुन्हा दाखल करण्यात आला आहे.
केजचे तहसीलदार यांनी जिल्हाधिकाऱ्यांच्या आदेशानुसार केज पोलीस ठाण्यात ही तक्रार नोंदवली असून संपूर्ण महसूल विभागात मोठी खळबळ उडाली आहे. महाराष्ट्र जमीन महसूल अधिनियम 1966 च्या कलम 155 अंतर्गत अर्धन्यायिक अधिकार हे तहसीलदारांना दिलेले असतात, मात्र संबंधित प्रकरणात तत्कालीन नायब तहसीलदारांनी स्वतःहून तहसीलदारांचे अधिकार वापरून आदेश पारित केल्याची गंभीर बाब समोर आली आहे.
याशिवाय आदेशावर तहसीलदारांच्या नावाने बनावट स्वाक्षरी करून तो आदेश ग्राम महसूल अधिकारी तसेच तलाठी कार्यालयाला पाठवण्यात आल्याचेही चौकशीत उघड झाले ही बाब उघडकीस आल्यानंतर जिल्हाधिकारी कार्यालयाने तातडीचे तपासाचे आदेश दिले आणि सखोल चौकशीत आदेशातील सही बनावट असल्याचे पुष्टी झाली आहे. तसेच हे आदेश देण्यासंदर्भातील प्रक्रिया बेकायदेशीर व नियमबाह्य असल्याचे स्पष्ट झाल्यानंतर केज तहसीलदारांनी अधिकृतपणे पोलिसात तक्रार नोंदवली या बनावट आदेशामुळे शेतकऱ्यांची दिशाभूल झाली असल्याची माहिती ही समोर आली.
महसूल विभागातील अधिकारी तलाठी यांच्याही कामकाजावर त्याचा परिणाम झाला प्रशासनाची दिशाभूल करून स्वतःच्या पदाचा गैरवापर केल्याचा गंभीर आरोप गुन्ह्यात करण्यात आला आहे. कायद्याने अर्धन्यायिक प्रक्रिया ही अत्यंत संवेदनशील व जबाबदारीची असते. त्यात कोणतेही आदेश तहसिलदारांच्या थेट सहीशिवाय वैद्य ठरत नाहीत. पण संबंधित नायब तहसीलदाराने तहसीलदार असल्याचा भास निर्माण करून आदेश देणे सहीची बनावट प्रत तयार करणे आणि ती शासन अधिकाऱ्यांना पाठवून हे सर्व गंभीर बेकायदेशीर कृत्य ठरल्याने आता त्यांच्यावर गुन्हा नोंदवण्यात आला आहे. फसवणूक, सरकारी कागदपत्रांची बनावट तयार करणे आणि अधिकाराचा गैरवापर यासह अनेक गंभीर कलमाखाली गुन्हा दाखल होण्याची शक्यता आहे. या प्रकरणामुळे केज तालुक्यातच नव्हे तर संभाजीनगर महसूल व जिल्हाधिकारी कार्यालयाचे खळबळ उडाले आहे. महसूल विभागातील अधिकाऱ्यांची विश्वसनीयता डागाळणाऱ्या या प्रकरणाची सखोल चौकशी करण्याबाबत वरिष्ठांकडून निर्देश देण्यात आले आहेत.
यामुळे महसूल विभागातील अंतर्गत प्रक्रियांचे पुनरावलोकन तसेच कामकाजात पारदर्शकता आणि दस्तऐवज पडताळणी अधिक कडक करण्याची गरज अधोरेखित झाली आहे. स्थानिक पातळीवर या घडामोडींची जोरदार चर्चा सुरू असून संबंधित अधिकाऱ्यावर कडक कारवाई अपेक्षित असल्याचे जनतेतून सूर निघत आहे.
