प्रतिनिधी- तुकाराम सुवर्णकार
दि. 22/ 2/2026 वार रविवार संगीत साधना मंच व मातृस्वर संगीत विद्यालय यांच्या संयुक्त विद्यमाने अंबाजोगाई येथील आदर्श वसाहत भागातील कपिल गणेश मंदिरात 24 वी मासिक शास्त्रीय संगीत सभा श्री हरीश कुलकर्णी ( लातूर) यांच्या बहारदार गायनाने संपन्न झाली.
कार्यक्रमाची सुरुवात दीप प्रज्वलना ने व सरस्वती मातेच्या प्रतिमेस पुष्प हार अर्पणकरून झाली. त्यानंतर बालगंधर्व संगीत विद्यालयातील पारितोषिक प्राप्त विद्यार्थ्यांचे सत्कार प्रमुख कलावंतांच्या हस्ते करण्यात आले. त्यानंतर मुख्य कार्यक्रमाला सुरुवात झाली लातूर येथील प्रसिद्ध कलावंत श्री हरीश कुलकर्णी यांनी आपल्या गायनाची सुरुवात राग-पुरिया कल्याण रागातील डॉ सुहासिनी कोरटकर यांनी बांधलेल्या ” शारदे दयानी विद्यादानी नादब्रह्म विहारीनी ” या विलंबित एकतालातील बंदीशीने केली विलंबित लय व संथ आलापिं व रागावरील पकड यामुळे वातावरण तयार झाले. त्यानंतर याच रागातील खयाल नुमा तारांना
“तोम तनन देरेना तदाणी” हा सादर करत सरगम व विविध प्रकारच्या तानांनी वातावरण बहरून आले. त्यानंतर ग्वाल्हेर घराण्यातील पारंपारिक बंदिश “सावरिया मग रोकत निसदिन “या तीनतालातील बंदिशीने रासिकांची मने जिंकली.. त्यानंतर दुर्गा रागातील “माता भवानी काली दुर्गा गौरी” या तीनतालातील बंदीश श्री हरीश कुलकर्णी यांनी सादर केली बोलबाट, सरगम व अलापी याने रागाचे बढत करत. उत्तम सादरीकरण केले नंतर एकतालातील भेंडीबझार घराण्यातील प्रसिद्ध बंदिश “अत सोहत चंद्र बदन” ही बंदिश व नंतर याचं रागातील तराना सादर करून रसिकाची दाद मिळविली.कार्यक्रमाच्या शेवटी “बोलावा विठ्ठल पहावा विठ्ठल” या संत तुकाराम महाराजांचे अभंगांनी या मैफिलीची सांगता झाली. यांना तबल्याची साथसंगत श्री जयप्रकाश हरिदास, हार्मोनियमची साथ श्री विश्वजीत धाट व पखवाजाची साथ श्री बंकटकुमार बैरागी यांनी केली.या कार्यक्रमासाठी अंबाजोगाईतील जेष्ठ -श्रेष्ठ कलाकार,जानकार रसिक श्रोते पत्रकार बंधू मोठ्या संख्येने उपस्थित होते..
